Camiño francés na provincia da Coruña

O Camiño Francés, a ruta máis coñecida e transitada do Camiño de Santiago, entra na provincia da Coruña polo concello de Melide, tras deixar atrás terras lucenses. Neste punto, os peregrinos acceden a unha das zonas máis emblemáticas do itinerario, onde se funden a tradición xacobea, o patrimonio arquitectónico e a hospitalidade galega.

Percorrer o último tramo do Camiño Francés é unha experiencia atinxible e moi demandada entre os que asisten a congresos na capital de Galicia. Existen múltiples empresas que levan a cabo desde hai anos esta actividade. Do Camiño ofrece rutas polo Camiño Francés desde Sarria, incluíndo aloxamento, traslados de equipaxe e outros servizos. Galician Roots é unha axencia local con enfoque VIP, que propón programas personalizados. A Axencia Camiño de Santiago organiza saídas con vehículo de apoio e aloxamentos seleccionados. Santiaguea dispón de paquetes pechados para excursionistas, mentres que Tee Travel, con máis de 20 anos de experiencia, traslada grupos con todo incluído.

Para os que asisten a un congreso, o máis habitual é comezar o Camiño de Santiago nos seus últimos tramos. Unha camiñada dun día moi completo podería comezar no Pino, último municipio antes de chegar a Santiago. O percorrido nesta zona está moi coidado: rodease de bosques de eucaliptos e carballos e os sendeiros pasan xunto a numerosos hórreos e casas de aldea. A tranquilidade da contorna transmítelle ao peregrino a sensación de proximidade á meta, que se asexa xa cando a senda se encamiña ao municipio de Santiago de Compostela polo Monte do Gozo, lugar cargado de simbolismo onde os peregrinos poden ver por primeira vez as torres da catedral. Desde alí, o descenso conduce directamente ao casco histórico, Patrimonio da Humanidade, coa maxestosa Catedral de Santiago como meta e símbolo universal da peregrinación.

Se se decide comezar máis lonxe, é imprescindible saber que para recibir a compostela (o certificado de ter realizado o Camiño) cómpre percorrer a pé polo menos 100 quilómetros, isto é, desde a localidade lucense de Sarria. Se se decide levar a cabo esta opción, a Ruta Xacobea pasa polo cruzamento de camiños histórico que é Melide, coa súa igrexa románica de Santa María e o cruceiro de San Roque, considerado o máis antigo de Galicia. Aquí é imprescindible responder forzas co seu célebre polbo á feira nas tabernas locais.

O traxecto avanza cara a Arzúa, localidade de longa tradición hospitalaria, famosa polo seu queixo con denominación de orixe protexida, que constitúe un dos símbolos culinarios de Galicia. Arzúa conserva tamén igrexas como a de Santiago e paisaxes rurais de gran beleza, con aldeas, corredoiras arboradas e prados verdes que acompañan o camiñante.