Experiencias auténticas para eventos en Galicia

Se queres sorprender aos asistentes do teu evento failles vivir experiencias únicas, desas que non se esquecen facilmente. Acceder a lugares inexplorados, sentir a cultura local en primeira persoa, elaborar produtos artesanais coas túas propias mans ou somerxerte na historia, as lendas e os misterios dun lugar especial, con maxia. Convidámosvos a percorrer algúns dos recantos máis singulares de Galicia e a coñecer as experiencias máis auténticas que podes realizar nos seus diferentes destinos. Desde o mar, a terra e o ceo verás un territorio que te sorprenderá e deixará un bo recordo na mente dos convidados ao teu evento.

Galicia é terra mariñeira e do mar procede parte da súa riqueza gastronómica. Comezamos o percorrido dunha  visita á lonxa  da Coruña ao amencer, una das máis importantes de Europa e a segunda de pesca fresca en España. Alí chegan, co abrente, os peixes e os mariscos das rías galegas, para que os mariñeiros e os mariscadores ofrezan en poxa. Este é un dos momentos máis importantes que se viven na lonxa, e formar parte del, escoitando as voces e contrasinais estipulados polos pescadores, vendo o tránsito de caixas, sentindo o olor a sal, a mar, a peixe e a marisco, é un espectáculo que non podes perder. Durante a poxa estaredes acompañados por un experto que vos explicará o procedemento e que é o que está pasando en c ada fase, ademais de coñecer os mariñeiros que participan nesta poxa que se repite cada día. Iso si, hai que madrugar moito, comeza ás 6 da mañá, dura aproximadamente unha hora e só dez persoas poden asistir previa solicitude. Sentirédesvos uns privilexiados por vivir este acontecemento en exclusiva. Na lonxa, situada nunha nave de 500m2 dividida en varias salas, móvense cada ano 40.000 toneladas de marisco e peixe: polbos, enormes pescadas e rapes, centolas e percebes son algúns dos produtos que irán aos mellores restaurantes de España, ou que en poucas horas se poderán comprar nos mercados coruñeses de Santa Lucía, Santo Agostiño ou a praza de abastos de Lugo. A experiencia pode completarse cunha degustación de peixe e marisco fresco nun destes mercados tradicionais.

Unha maneira única de experimentar os sabores e olores de Galicia é entrando no Mercado de Abastos de Santiago de Compostela, considerado un dos mellores mercados de España, e o segundo lugar máis visitado no casco histórico da cidade, moi preto da catedral. Un mercado diferente porque ten vida, alí pódense sentir a cultura e tradicións galegas a través dos produtos frescos da terra. É a despensa de Galicia, onde trabar conversa cos agricultores e coñecer a figura da paisana, a muller que vai vender alí os produtos do seu horto. O mercado está formado por oito naves e hai uns cen negocios: verduras e froitas, postos de peixe e marisco, panadería, carnicería, viñoteca, tenda de aceites, de especias, de fotografía… Mesmo obras de autor con pezas galegas, cestos, un zapateiro… É unha experiencia singular, ir de compras polo mercado e degustar alí mesmo os produtos pedindo que os cociñen no momento, máis fresco imposible. Ademais, na parte interior do mercado está o Abastos 2.0, unha orixinal taberna que mantén o estilo clásico do mercado mesturado cun mobiliario moderno que o converte nun espazo gastronómico diferente e orixinal. Para eventos, no Mercado de Abastos está a aula Gastrocultural, que dispón dunha cociña e se pode dividir en dúas ou tres salas grazas aos tabiques móbiles que permiten distintos formatos. Alí adoitan facerse presentacións de produto, comidas e ceas, talleres onde se empregan produtos do mercado… Poden organizarse eventos especiais, por exemplo, unha ruta polo mercado, degustación e culminación cunha actividade na aula. Estrela Galicia é unha das marcas que escolleu este lugar para algún dos seus eventos.

Volvendo ao mar, que vos parece navegar entre bateas pola ría de Vigo? Esta zona é moi propicia para eventos náuticos e Sailway levaravos a coñecer a costa e o Parque Natural Marítimo Terrestre das Illas Atlánticas a bordo de iates de vela de cruceiro. Unha experiencia memorable que se pode compaxinar con actividades en terra como rutas interpretativas nas illas Cíes ou degustación da gastronomía galega nas vilas mariñeiras. O porto de saída e chegada será o Real Club Náutico de Vigo, e durante a travesía explicaranvos curiosidades da contorna e a súa historia, e poderedes participar na manobra do barco, será un bautismo de mar, fondeando nas illas Cíes, Ons ou Sálvora. Para un evento corporativo esta experiencia somerxerá aos participantes é unha auténtica regata para que desenvolvan as súas capacidades de traballo en equipo e implicación nun obxectivo común, nunha competición na que poderán divertirse e soltar adrenalina. Empresas como Sanitas, BBVA ou Bosch viviron esta experiencia nalgún dos seus eventos.

A ría de Vigo está chea de bateas, estruturas dispostas ordenadamente xunto á costa para o cultivo de bivalvos propias das rías galegas. Desas grandes plataformas de madeira penduran cordas nas que se cría un dos maiores tesouros de Vigo: as ostras e os mexillóns. Os barcos bateeiros levantan con grúas as pesadas cordas cargadas de moluscos; é un espectáculo velos faenar. Navieira Mar de Ons organiza a ruta do mexillón con degustación a bordo, para navegar pola ría ata chegar á ponte de Rande, pasando polo porto pesqueiro de Vigo, un dos peiraos pesqueiros máis grandes do mundo, o monte da Guía, as vilas mariñeiras da península do Morrazo, como Cangas ou Moaña, e os polígonos de bateas onde un guía vos explicará o proceso de cultivo de mexillón e probaredes este exquisito molusco acabado de preparar para que descubrades o auténtico sabor do mar.

E desde o mar divísase outro recanto de Galicia que destaca pola súa singularidade: o mirador do Ézaro, ao lado do monte Pindo, o olimpo sagrado dos celtas. Está nun dos enclaves máis atractivos e menos explorados, a Costa da Morte, un lugar ideal para practicar actividades en contacto coa natureza. Queres saber que ten de especial? Os fermosos lugares desta costa están cheos de rutas e lugares aos que é imposible acceder por terra, por iso o kayak é unha das mellores alternativas para entrar na Costa da Morte. Para contemplalo todo desde outra perspectiva, Adventurézaro organiza a ruta de Ézaro en kayak para que poidades asomarvos ao monte Pindo desde a súa base, contemplar a fervenza do Ézaro á que entraredes desde a mesma Porta Máxica, ou penetrar en Caneliñas como facían as baleas que chegaban á factoría. Este é un dos lugares que gardan os segredos do olimpo celta, as súas historias e as súas lendas. Por iso durante o percorrido contaranvos anécdotas do monte Pindo, descifrarán as mensaxes das inscricións feitas nas ruínas, coñeceredes como era o estaleiro viquingo que houbo no río e a historia do cabo Fisterra.

Falando de historias, lendas e misterios, quen non escoitou falar da queimada e do seu conxuro? Un ritual ancestral de orixe celta cun inspirador simbolismo. A Terra represéntase na xerra de barro, a auga está representada polo augardente e o lume representa a danza libre entre os elementos que conforman esta apóxema máxica que dá calor ao corpo e purifica as almas. No Pazo de San Lourenzo, co seu claustro centenario arredor dun enorme buxo, somerxerédesvos nunha contorna máxica para vivir o espectáculo da Queimada e o Conxuro, nun ambiente bucólico, só iluminado polo calor de máis dun cento de pequenas velas acendidas. Coas luces xa apagadas irrompe en escena un cego que simula percorrer o Camiño de Santiago tocando a zanfona e interpretando vellos romances. Co desencadeamento dunha gran tormenta, entre efectos de fume, son e iluminación ambienta, fai a súa aparición o bruxo, vestido cun traxe de palla propio da indumentaria galega tradicional e portando unha tea ardente. Accede ata un pequeno oratorio elevado que simula un castro celta, no que se atopa un recipiente de barro que contén a queimada. O bruxo, mentres vai queimando a queimada movéndoa e verténdoa de maneira constante cun cazo de barro, declama o conxuro, mentres se intercala algunha música de fondo e algúns outros efectos de iluminación e son. Ao termo do recital, que remata cunha invocación que di “Por Santiago, San Xoán e San Andrés, queimada eu te fixen, queimada ti es”, e o estoupido dun trono, empeza a soar unha tradicional peza galega de pandeireta e gaita, moi festiva, que convida a que todo o mundo se anime mentres fai entrada o equipo de camareiros do pazo, que ofrecen aos convidados a degustación nunha cunca de barro da queimada acabada de facer. A cada persoa entrégaselle un pergamiño co texto do conxuro para que o leve de recordo ou o recite bebendo esta apócema máxica mentres osa a animada música de folclore galego tradicional de fondo.

Para seguir vivindo experiencias únicas e afondar na cultura local, formando parte do día a día dunha aldea, marchamos ata Santiago de Albá (Lugo), comarca da Ulloa, onde se atopa Arqueixal, unha granxa familiar que aposta polo ecoagroturismo, un turismo agrario centrado no campo e o ecolóxico. A tan só 3 quilómetros de Palas de Rei, etapa do Camiño de Santiago, comezaredes unha viaxe pola vida e pola cultura da comunidade galega, coñecendo de primeira man as tarefas da granxa e participando nas actividades diarias como a produción de queixo, iogur e leite fresco de Denominación de Orixe Arzúa-Ulloa. Que actividades de agroturismo se poden realizar? Aprenderedes como se fai o queixo artesanal nun obradoiro de elaboración de produtos típicos. Ou ser pastor por un día, participar no coidado dos animais, muxir as vacas, recoller os ovos das pitas, coidar da horta e ata confeccionar as vosa propia cesta de produtos ecolóxicos recollidos coas vosas propias mans e que tamén poderedes degustar. E para completar a experiencia, viaxar ao pasado visitando un museo vivo coñecido como a Casa da Rebordela, unha casa rural construída hai 250 anos que mantén os seus elementos en funcionamento e escenifica a vida rural antiga. A leña arde, os olores están presentes, a carne permanece colgada. Todo se mostra coma se estivese aínda habitada e se estivese traballando nela. Se decidides aloxarvos alí, Arqueixal ten casas rurais antigas cunha construción sostible que respecta a arquitectura tradicional e que se abastecen con enerxías renovables. Son catro casas: A Palleira, A Caseta das Andoriñas, A Casa do Muiñeiro e O Pallar das Ameixeiras, de pedra, madeira, vidro, arxila e cal, pinturas ecolóxicas e illantes de cortiza e fibras vexetais.

Un espectacular museo ao aire libre é o que atoparedes na Ruta das Meninas de Canido en Ferrol con ata 200 meninas, cada unha co seu estilo. Está considerada unha das rutas de street art máis importantes de Europa, unha mostra de como a arte pode cambiar a morfoloxía dunha área urbana esquecida. O artista Eduardo Hermida comezou esta acción pictórica coa axuda dos veciños e artistas de diversas disciplinas, que vestiron os edificios con interpretacións dos cadros de Velázquez. Se te instalas a app Visuartech poderás comprobar como 18 delas cobran vida grazas á realidade aumentada. Un circuíto cultural para visitar este museo ao aire libre. Ademais podedes aproveitar a visita para descubrir o Ferrol modernista a través dunha ruta dramatizada. Unha vintena de edificios modernistas no barrio da Magdalena que contrastan dentro do racionalismo das súas rúas trazadas a escuadra e cartabón. Coma un fantasma de principios do século pasado chéganos Catherine Wilson, esposa dun enxeñeiro inglés contratado por un estaleiro, quen irá discubrindo estas obras arquitectónicas.

De paseo polas rúas e recantos das súas cidades, subimos ás alturas para sobrevoar en globo aerostático unha das zonas máis emblemáticas de Galicia: a Ribeira Sacra, que recibe ese nome polos numerosos mosteiros edificados á beira dos ríos Miño e Sil e pola cantidade de carballos que hai nela. Un lugar para coñecer a cultura do viño, rodeado de viñedos colocados nas terrazas das ribeiras do río que forman paisaxes incribles.

Da man de Aerotours, realizaredes un voo exclusivo con actividades de orientación de equipos que se farán parte en terra en parte no aire. Unha combinación de actividades orientadas á consecución de obxectivos en equipo, utilizando como ferramenta a competición aerostática, para a que se requiren habilidades en terreos tan diversos como a orientación, manexo de mapas topográficos e trazado de rumbos para conseguir un obxectivo común. Todo isto mentres gozades das espectaculares vistas. A primeira hora da mañá, cando as condicións meteorolóxicas son mellores e a luz máis bonita, sairedes desde un dos dous campos de despegue, un preto de Taboada e o outro preto de Chantada. A ruta sempre é diferente, porque o globo vai onde o leve o vento, e ao aterrar gozaredes dun xantar con produtos típicos. Ao finalizar darásevos un certificado da experiencia, fotos e un vídeo para que recordaredes este paseo polas nubes.

Se preferides coñecer a Ribeira Sacra do Miño pisando terra, Sacra Experiences organiza unha ruta na que gozaredes de Belesar, o Cabo do Mundo a fervenza de Augascaídas, os viñedos de Chantada entrando na Abadía da Cova – Adegas Moure para facer unha degustación. E tamén descubriredes a Ribeira Sacra do Sil desde os miradoiros dos canóns do Sil e unha emocionante viaxe en catamarán por este río.

En Galicia, ademais do famoso Camiño de Santiago, hai outros camiños, coma o Camiño do Viño, que é a ruta do Ribeiro de Ourense. Un encontro vinícola cos viños e os seus creadores nalgunha das múltiples bodegas que hai na D.O. Ribeiro, na que coñeceredes as variedades de uva, o proceso de elaboración do Ribeiro, as calidades da contorna e, por suposto, degustaredes unha cata en bodega ou nun picnic no medio dos viñedos. Outra das actividades nas que se pode participar é a vendima, vivir en primeira persoa o proceso de recolección e selección e uva, un traballo arduo e meticuloso para obter os mellores resultados, sería unha boa opción para un teambuilding.

A comarca do Ribeiro tamén é famosa polo termalismo e a calidade das augas que emana o territorio. Unha experiencia de wellness que ten como protagonista á uva e as súas propiedades para a pel polos seus principios activos e polifenoles, é a viñoterapia, que poderedes gozar no spa do hotel Eurostars Monumento Monasterio de San Clodio en Leiro. Ao rematar, e unha vez sentistes a ptencia do Ribeiro por dentro e por fóra, podedes continuar descubrindo a zona navegando en catamarán, un ecobarco eléctrico, polo Miño ao seu paso polo tramo da D.O. Ribeiro.